dagens fangst og middag – eit kast, og vips..!

Denne middagen er dedikert til fru Ingvaldsen, fiskelærar nr 1!

I morgon har eg budd på Møkster i to veker, og det har vore innhaldsrike, gode dagar. Eg har allereie erfart kvifor ein må passe rutetidene for hurtigbåten, kanskje særleg når det er siste båten for dagen, og ein rett og slett ikkje kjem seg heim. Så ja, eg har lært å berekne ferje i god tid.

I går var det mykje folk her, då det vart markert at dei to nye tomtene på øya er planert ut. Statsråd Navarsete og ordføraren og mange lokale heltar og heltinner markerte med høgtid; taler, planting av tre og framfor alt kake og kaffi i skulehuset. Eg er imponert over kva Møkster bu har fått til dei siste to åra, og no haustar ein fruktar ved at 7 nye innbyggjarar er eit faktum. Og at elevtalet aukar 60% er retterleg endå tøffare !

I føremiddag før regnet kom tok eg stanga fatt og gjekk ned til fiskeplassen som har gjeve fisk på kroken kvar gong eg har forsøkt. Etter råd frå lokale heltar og heltinner (les: Karmøy) veit eg no kor eg skal få tak i billige slukar (ja, for eg har mista nokre…) og kor det er fisk å få. I dag fekk eg ein stor lyr på kroken; ca 700gram – og JA, eg vart veldig veldig mett!

På vestsida er det ope hav. Herleg å sjå på! Hjarteleg velkomne på besøk!